2025-05-31

Daar is baie mense wat vir my bid en ondersteun.  Na behandeling hou ek daarvan om gou terugvoer te gee en almal op hoogte te hou.  Dit keer vat dit egter ’n tydjie om my emosies agtermekaar te sit.

 

Ek begin weer met die kort antwoord as iemand dal nie kans het om alles te lees nie:

Die toetse is klaar - bloed, urine, longe, angiogram en fisioterapeut.  Ook gesprekke met dieetkundige, sielkundige, hartoorplanting program bestuurder en die hartoorplanter homself.

My syfers is reg vir n oorplanting en ek is op die waglys, maar nie die dringende lys nie

n Oorplanting het BAIE newe effekte.

Dok wil kyk of ons nog n klompie myle uit die hart kan kry.

Ek moet elke 3 maande na die kardioloog gaan sodat ons verswakking of hopelik verbetering kan monitor.

 

 

Nou vir die lang antwoord:

Ds Clark het gister gebel en ons het lekker gesels – blykbaar neem dit ’n mens tot 72 uur om ’n moeilike boodskap te verwerk, so ek het nog tot 12:34 😊

 

So ja - baie gemengde gevoelens en nie die nuus waarvoor gehoop is nie.  Daar is nognie ’n oplossing naby nie. (nie dat ’n hartoorplanting vinnig is nie, jy kan ’n jaar wag vir ’n hart en na die operasie is jy 3 maande uit)

Dit voel so ek is te siek om te werk, maar nognie siek genoeg vir ’n ander hart nie. Dit is nou wag en sien…elke keer drie maande op ’n slag…

As ek nou al voorberei sou word vir ’n hartoorplanting is daar ‘n proses om na uit te sien – sodra ek ’n hart kry kan die pad tot beterskap begin, maar nou is dit wag…

Ek voel nou soos wanneer jy plek hou in die ry by die supermark, maar jou vrou is nog tussen die rakke – elke keer as jy amper voor is laat jy die volgende persoon verbykom.

Ek het in die hospitaal 3 mense ontmoet wat hartoorplantings gekry het – een reeds 19 jaar gelede.  Ja daar is baie pille en moets en moenies, maar hulle leef normaal en dit lyk so lekker.

 

Ek moet saamleef met die moeg en uithou.  Dit is soos as jy die Munga trap voor Fraserburg – dit voel of jy vir twee dae lank die Kerktoring sien sonder dat hy nader kom 😊

Bietjie teleurgesteld dat daar nie n vinnige plan is nie en dankbaar dat daar n plan is as ek verder verswak.

Dankbaar en Geseend dat ek met so min steeds so baie kan doen.

 

Ek het die positiewe en negatiewe probeer neerpen – maar dit het nognie getroos nie.

+ Ek voel nog redelik goed en kan myself help

+ My syfers is goed genoeg om ’n hart te kan ontvang

+ Ek is op die oorplant waglys

- Ek bly moeg

- Ek kan nie bestuur nie

- Ek kan nie juis werk nie

 

So ek moet bietjie dieper delf

Na ek 80% hartfunksie verloor het (nou nie tegnies heeltemal korrek nie, maar ek het net 20% oor gehad) was ek een oggend bietjie mismoedig.  Ek kry toe die boodskap: moenie kyk na die 80% wat weg is nie, maar na die 20% wat oor is.  Dit het nogal gehelp.

Maar toe verloor ek nog 40% van die 20% en het nou 12% hartfunksie.

Mens is nogal ingeperk as jy nie self kan bestuur of ver stap nie.

 

Ek het vanoggend besluit – as ek net 12% hartfunksie het gaan ek dit ALLES gebruik!

Ek gaan doen wat ek kan en net op die “KAN” lysie konsentreer.

En toe kry ek ’n half uur later die versie by Fanie Kriel:

 

Ps37:3

Vertrou liewer op die Here en doen wat goed is, woon en werk rustig voort.

 

Hoop

In Januarie 2024 het my hartritme deurmekaar geraak.

Ons kry toe ’n afspraak om vir ’n hartskok te gaan – wat toe nie gebeur nie

Ek kry toe medikasie en vertrou daarop – tevergeefs

Toe sien ons uit na die pasaangeer – ook nie verskil nie

Daarna is ons hoop op die ablasie – maar dit help nie

Nou hoop ons op ’n hartoorplanting – maar ons is ook nognie daar nie…

Elke keer is daar hoop en teleurstelling…

 

Toe kry ek die raad by Alex Clark

Wanneer ons, ons vertroue in iemand anders plaas, gee ons beheer prys. Om iemand anders te vertrou beteken dat ons nie meer ten volle in beheer is nie.

Wanneer ek verklaar dat ek vir God vertrou, dan erken ek dat ek nie beheer het nie, maar dat ek kies om vir God beheer te gee…

Charles Feltman definieer vertroue as: “Choosing to risk making something you value vulnerable to another person’s action’s”.

 

’n Pel van my wag vir die uitslae van ’n biopsie – ek sê altyd vir ander mense:  Die wag gee vir ons meer tyd om bid.

Nou moet ek self wag en dit is nie so maklik nie – maar ek het die boodskap ook ’n paar keer gekry: Wag op Die Here

 

PSALMS 27:14 AFR53. Wag op die Here! Wees sterk en laat jou hart sterk wees! Ja, wag op die HERE!

 

Nou vir vorentoe:

Ek gaan LEWE en die lewe geniet – en vir my naaste doen alles wat ek kan.

·         Alles moontlik word reeds vir my hart gedoen.

·         Ek gaan op die res van my liggaam ook konsentreer

·         Ek het al baie spiermassa verloor en gaan meer proteien inneem om spiere te beskerm

·         Ek gaan baie liggies oefen om my spiere te behou

·         Ek gaan 7Kg gewig afskud (dit is bietjie moeiliker sonder oefening maar ek sal)

·         My ystervlakke is te laag en ek gaan aanvullings neem (en staalwop op my brood smeer)

 

 

Jesaja 41:10

Ek versterk jou, Ek help jou, Ek hou jou vas, met My eie Hand red Ek jou.

 

God wil hê dat ons op Sy krag staatmaak en nie op ons eie nie.  Hy laat toe dat ons hulpbronne so kwyn dat ons op Sy krag moet staatmaak om voort te gaan.

 

As jy op ‘n punt is waar daar nie medies/menslik veel vir jou gedoen kan word nie, aanvaar makliker God se wil.  Here, laat U wil geskied!